Ah'd left work early - anticipation!
Tho' the boss lacked ma elation
Ma he'rt was poundin' - sic' vibration!
Tae be at the Cryin' o' The Mairches!

The train e’ en faster hameward sped
Ma e'en were moist, ma he'rt was gled
Tae no' be here, whaur else instead ?
Than be at the Cryin' o' The Mairches!

Jest time for ae drink in the 'Star'
Must be the lounge - an' no' the bar
Can be nae herm in jest yin jar!
Hame for the Cryin' o' The Mairches!

There's Wullie an' Puffer - the halberdiers,
Toon Crier, a' wi' haufs an' beers
Preparin' weel in pageant gear
For this, the Cryin' o' The Mairches

Whit's that? - Ah thocht ah heard a toot!
Ran tae the door an' Ah lookit oot
Aye, as Ah thocht, the Bathgate Flutes
Here for the Cryin' o' The Mairches!

Then up the street the bairnies tease
The Crier, wi' their ain 'Oyez'
"Hauf a pund o' rotten cheese!"
Aye, it's the Cryin' o' The Mairches!

For centuries in this auld toon
The Mairches cried, the month o' June
For me it canna come too soon, ‘tis
the Cryin' o' The Mairches!